Vazirlar Mahkamasi huzuridagi Prezident, ijod va ixtisoslashtirilgan maktablarni rivojlantirish agentligi tizimidagi ixtisoslashtirilgan maktablarga 2021-2022-o‘quv yili uchun iqtidorli o‘quvchilarni saralab olish tartibi to‘g‘risida muvaqqat

NIZOM

(Asos: Prezident, ijod va ixtisoslashtirilgan maktablarni rivojlantirish agentligi direktorining 2021 yil 3 iyundagi 61 i/ch-sonli buyrug‘i)

1-bob. Umumiy qoidalar

1.1. Mazkur muvaqqat nizom O’zbekiston Respublikasi Vazirlar Mahkamasi huzuridagi Prezident, ijod va ixtisoslashtirilgan maktablarni rivojlantirish agentligi (keyingi o‘rinlarda – Agentlik) tizimidagi Abu Ali ibn Sino, Mirzo Ulug‘bek hamda Muhammad al-Xorazmiy nomidagi ixtisoslashtirilgan maktablarga (keyingi o‘rinlarda – ixtisoslashtirilgan maktablar) iqtidorli o‘quvchilarni (keyingi o‘rinlarda – talabgor) saralab olish hamda qabul qilish tartibini belgilaydi.

Ta’lim Muhammad al-Xorazmiy nomidagi (axborot-kommunikatsiya texnologiyalariga oid (informatika, fizika, matematika, ingliz tili) fanlar chuqurlashtirilib o‘qitishga) ixtisoslashtirilgan IT-maktabida o‘zbek tilida, Abu Ali ibn Sino nomidagi yosh biologlar va kimyogarlar (biologiya, kimyo) hamda Mirzo Ulug‘bek nomidagi (fizika, astronomiya, matematika, informatika, ingliz tili) ixtisoslashtirilgan maktablarda o‘zbek va rus tillarida olib boriladi.

1.2. Iqtidorli bolalarni aniqlash, ularni ixtisoslashtirilgan maktablarga qabul qilish uchun kirish imtihonlari (keyingi o‘rinlarda – kirish imtihoni) o‘tkaziladi.

Kirish imtihonlari bitta bosqichda (test sinovi) tashkil etiladi.

1.3. Ixtisoslashtirilgan maktablarga o‘quvchilar belgilangan yillik qabul kvotasi doirasida qabul komissiyasi tomonidan o‘tkaziladigan kirish imtihonlari natijalari asosida qabul qilinadi.

1.4. Ixtisoslashtirilgan maktablarga o‘quvchilarni qabul qilish teng huquqlilik, adolat va shaffoflik tamoyillari asosida amalga oshiriladi.

1.5. Belgilangan kvotaga asosan kirish imtihonlari natijalari bo‘yicha eng yuqori ball olgan o‘quvchilar o‘qishga qabul qilinadi.

1.6. Chet el fuqarolarining farzandlarini ixtisoslashtirilgan maktablarga saralab olish va qabul qilish “Ta’lim to‘g‘risida”gi Qonunga, boshqa qonunchilik hujjatlariga hamda ushbu nizomga muvofiq amalga oshiriladi.

2-bob. Hujjatlarni qabul qilish

2.1. Ixtisoslashtirilgan maktablarga o‘quvchilarning hujjatlari hududiy mansubligidan qat’iy nazar qabul kvotasi doirasida belgilangan sinflar uchun qabul qilinadi.

2.2. Kirish imtihonlarida ishtirok etish uchun hujjatlar davlat va nodavlat umumiy o‘rta ta’lim muassasalarining:

Muhammad al-Xorazmiy nomidagi ixtisoslashtirilgan IT-maktabiga – 4- va 9-sinflarni;

Abu Ali ibn Sino nomidagi yosh biologlar va kimyogarlar hamda Mirzo Ulug‘bek nomidagi ixtisoslashtirilgan maktablariga – tegishliligi bo‘yicha 6-7-sinflarini tamomlagan o‘quvchilar qabul qilinadi.

2.3. Xorijiy ta’lim muassasalarida o‘qiyotgan O’zbekiston Respublikasi fuqarolarining farzandlari ixtisoslashtirilgan maktablarning tegishli sinflariga hujjat topshirishi mumkin.

Bunda, talabgor tomonidan o‘zi ta’lim olayotgan ta’lim muassasasining baholar tabeli(yoki shunga tenglashtirilgan rasmiy hujjat)ning davlat tiliga tarjima qilingan va tegishli tartibda notarial idora tomonidan tasdiqlangan shakli taqdim etiladi.

2.4. Talabgorlarning hujjatlari 1-20 iyul kunlari onlayn shaklda qabul qilinadi.

2.5. Talabgorlar quyidagi hujjatlarni onlayn shaklda taqdim etadi:

qabul komissiyasi raisi nomiga tegishli tartibda rasmiylashtiriladigan ariza;

talabgorning tug‘ilganlik to‘g‘risida guvohnoma (kinder pasport) nusxasi;

talabgorning oxirgi 2 oy davomida tushgan 3×4 o‘lchamdagi rasmi;

talabgorning 2020-2021-o‘quv yili natijasiga ko‘ra baholar tabelining maktab direktori tomonidan tasdiqlangan (10-sinflar uchun 9-sinfni bitirganligi to‘g‘risidagi shahodatnoma) nusxasi;

talabgor hamda uning ota-onasi yoki ularning o‘rnini bosuvchi shaxslar (keyingi o‘rinlarda – qonuniy vakillar) fuqarolik pasporti ma’lumotlari (agar qonuniy vakili tomonidan hujjat topshirilsa ularning qonuniy vakili ekanligini tasdiqlovchi notarial hujjat ilova qilinadi), aloqa uchun telefon raqami, elektron pochta manzili platformaga kiritiladi.

Shuningdek, platformada talabgor, uning qonuniy vakillari kirish imtihonlari shartlari, talabgor hamda qabul komissiyasining huquq va majburiyatlari bilan tanishganligi to‘g‘risidagi ofertani tasdiqlaydi.

2.6. Hujjatlar qabuli an’anaviy tarzda amalga oshirilganda, talabgorlardan quyidagi hujjatlar qog‘oz shaklida qabul qilinadi:

qabul komissiyasi raisi nomiga ariza;

tug‘ilganlik to‘g‘risida guvohnoma (kinder pasport) nusxasi;

talabgorning oxirgi 2 oy davomida tushgan 3×4 o‘lchamdagi 6 dona rasmi;

talabgorning 2020-2021 o‘quv yili natijasiga ko‘ra baholar tabelining maktab direktori tomonidan tasdiqlangan nusxasi;

2.7. Hujjatlarni belgilangan muddatlarda, to‘g‘ri va sifatli taqdim etish bo‘yicha mas’uliyat talabgorning ota-onasi (qonuniy vakillari) zimmasiga yuklatiladi.

2.8. Talabgorning hujjatlari operatorlar guruhi tomonidan ko‘rib chiqilgandan so‘ng ularga hujjatlar qabul qilinganligi yoki rad etilganligi to‘g‘risida xabar yuboriladi.

Hujjatlar rad etilganda talablarda ko‘rsatilgan kamchiliklarni bartaraf etish uchun xabar yuborilgan vaqtdan boshlab 48 soat ichida to‘g‘rilashga va qayta topshirishga imkon beriladi.

Hujjatlarni qabul qilish muddati tugagandan so‘ng ma’lumotlarni o‘zgartirishga imkon berilmaydi.

2.9. Talabgorning qonuniy vakillari hujjatlarni qabul qilish muddati tugagunga qadar taqdim etilgan arizani qaytarib olish va bekor qilish huquqiga ega.

2.10. Ixtisoslashtirilgan maktablarga kirish imtihonlarida talabgorlarga imtiyozlar berilmaydi.

2.11. Ixtisoslashtirilgan maktablarga o‘quvchilar qabul jarayonini to‘g‘ri tashkil etish uchun mas’uliyat Agentlik tashkiliy qo‘mitasi hamda qabul komissiyasi zimmasiga yuklanadi.

2.12. Kirish imtihonlarida raqobat va shaffoflikni ta’minlash maqsadida hujjatlarni qabul qilish boshlanishidan kamida 10 kun oldin ixtisoslashtirilgan maktablar tomonidan ommaviy axborot vositalarida (respublika, viloyat va tuman (shahar) miqyosidagi gazetalar, ijtimoiy tarmoqlarda) e’lon beriladi.

3-bob. Hujjatlarni rad etish

3.1. Hujjatlarni qabul qilishni rad etish uchun quyidagilar asos bo‘ladi:

belgilangan muddatlardan keyin kirish imtihonlarida ishtirok etish xohishi bildirilganda;

ushbu tartibning 2.5-bandida belgilangan hujjatlar to‘liq bo‘lmaganda;

taqdim etilgan hujjatlardagi yozuvlar, muhrdagi yozuvlar sifatsiz holda nusxalangan yoki skanerlangan bo‘lsa;

talabgor tomonidan taqdim qilingan hujjatlarning soxta ekanligi aniqlanganda;

umumiy o‘rta ta’lim muassasalarining tegishli sinflarida o‘qishni to‘liq tamomlagan talabgorlar ixtisoslashtirilgan maktabining shu sinfida takroran o‘qishni talab qilganda.

4-bob. Qabul komissiyasi

4.1. Hujjatlarni qabul qilish, rasmiylashtirish, kirish imtihonlari sinovlarini bevosita tashkil etish va o‘tkazish maqsadida ixtisoslashtirilgan maktablarda qabul komissiyasi (keyingi o‘rinlarda – Qabul komissiyasi) tuziladi.

4.2. Qabul komissiyasi tarkibi 5 nafardan kam bo‘lmagan toq miqdorda ixtisoslashtirilgan maktab direktori, uning o‘rinbosarlari va malakali o‘qituvchilardan tashkil etiladi hamda ixtisoslashtirilgan maktab direktori buyrug‘i bilan tasdiqlanadi.

4.3. Qabul komissiyasi tarkibiga Agentlikning tegishli bo‘linmalari xodimlari, shuningdek, Vazirlar Mahkamasining “Ijod maktablari va ixtisoslashtirilgan maktablar faoliyatini yanada takomillashtirish chora-tadbirlari to‘g‘risida” 2020-yil 11-martdagi 141-son qaroriga muvofiq otaliqqa olish va rivojlantirish uchun biriktirilgan oliy ta’lim muassasalari, vazirliklar, idoralar hamda mahalliy ijro etuvchi hokimiyat organlari vakillari kiritilishi mumkin.

4.4. Ixtisoslashtirilgan maktabning direktori Qabul komissiyasining raisi hisoblanadi. Zarurat tug‘ilganda, o‘quv ishlari yoki ixtisoslik fanlari bo‘yicha direktor o‘rinbosari qabul komissiyasi raisi etib tayinlanishi mumkin.

4.5. Agentlik tashkiliy qo‘mitasi talabgorlar tomonidan (onlayn) taqdim etilgan hujjatlarni ko‘rib chiqish bo‘yicha operatorlar guruhi tarkibini tasdiqlaydi.

Operatorlar guruhi tarkibi har bir ixtisoslashtirilgan maktab bo‘yicha alohida shakllantiriladi.

4.6. Operatorlar guruhi:

talabgorlarning onlayn taqdim etgan hujjatlarini mazkur tartib talablari asosida taqdim etilganini ko‘rib chiqadi;

ko‘rib chiqish natijasida talabgorning hujjatlarini qabul qilish yoki qabul qilishni rad etish to‘g‘risida qaror qabul qiladi;

hujjatlarni qabul qilish rad etilgan hollarda uning rad etilish sabablarini aniq ko‘rsatgan holda talabgorning shaxsiy kabinetiga yoki telefon raqamiga SMS shaklida xabar yuboradi;

qabul komissiyasi bilan birgalikda hujjati qabul qilingan talabgorlarning ro‘yxatini shakllantiradi, kirish imtihoni shartlariga mos ravishda guruhlarga taqsimlaydi;

tasdiqlangan jadval asosida murojaat qiluvchilarga maslahat berib boradi;

qabul qilingan hujjatlarning kunlik monitoringini olib boradi, qabul komissiyasi bilan birgalikda Agentlikka kunlik axborot kiritadi.

4.7. Qabul komissiyasi:

ishchi guruh bilan birgalikda talabgorlar hujjatlarini elektron shaklda qabul qilish jarayonlarini muvofiqlashtiradi, zarurat tug‘ilganda yoki hujjatlar qog‘oz shaklida taqdim etilganda ro‘yxatga olish kitobiga rasmiylashtiradi;

kirish imtihonlari o‘tkaziladigan joylarni tayyorlaydi;

talabgorni, uning ota-onasini yoki boshqa qonuniy vakillarini kirish imtihonlari shartlari bilan tanishtiradi, kirish imtihonlari o‘tkazilish vaqti va joyi to‘g‘risida ogohlantiradi;

tasdiqlangan jadval asosida murojaatchilarga tushuntirishlar berib boradi;

kirish imtihonlarini bevosita tashkil etish va uni o‘tkazishga mas’ul hisoblanadi;

talabgorlar va ularning qonuniy vakillari tomonidan berilayotgan savollarga javob tayyorlash va ularni veb-sayt, ijtimoiy tarmoqlar orqali keng ommaga taqdim etish choralarini ko‘radi.

kirish imtihonlari natijalarini e’lon qiladi, fuqarolar tomonidan e’tirozlar yoki tushunmovchiliklar yuzaga kelganda, apellyatsiya komissiyasi bilan birgalikda ko‘rib chiqadi hamda ularga natijalarni ma’lum qiladi.

5-bob. Kirish imtihonlarini tashkil etish va o‘tkazish tartibi

5.1. Kirish imtihonlari ixtisoslashtirilgan maktablarda chuqurlashtirib o‘qitiladigan fanlarning yo‘nalishidan (keyingi o‘rinlarda – yo‘nalish) kelib chiqqan holda Agentlik hamda ixtisoslashtirilgan maktablarda tashkil etiladigan qabul komissiyasi tomonidan o‘tkaziladi.

5.2. Ixtisoslashtirilgan maktablarga kirish imtihonlari bir bosqichda o‘tkaziladi.

Yo‘nalishlar bo‘yicha kirish imtihonlari Tashkiliy qo‘mita tomonidan belgilangan muddat va binoda zamonaviy kompyuter texnologiyalari orqali quyidagi ballar taqsimotiga muvofiq amalga oshiriladi.

Axborot texnologiyalari yo‘nalishi bo‘yicha:

5-sinflar uchun

40 ta javobi tanlanadigan test topshiriqlari, jumladan:

1-fan: 30 ta test matematika fanidan,  shundan 10 ta mantiqiy fikrlashga yo‘naltirilgan – 93 ball, har bir to‘g‘ri javob uchun 3,1 baldan;

2-fan: 10 ta test ingliz tili fanidan – 11 ball, har bir to‘g‘ri javob uchun 1,1 baldan.

10-sinflar uchun

40 ta javobi tanlanadigan test topshiriqlari, jumladan:

1-fan: 10 ta test matematika fanidan, shundan  5 ta mantiqiy fikrlashga yo‘naltirilgan – 31 ball, har bir to‘g‘ri javob uchun 3,1 baldan;

2-fan: 10 ta test informatika fanidan – 31 ball, har bir to‘g‘ri javob uchun 3,1 balldan;

3-fan: 10 ta test fizika fanidan – 21 ball, har bir to‘g‘ri javob uchun
2,1 balldan;

4-fan: 10 ta test ingliz tili fanidan – 11 ball, har bir to‘g‘ri javob uchun 1,1 baldan.

Biologiya va kimyo yo‘nalishi bo‘yicha:

7-sinflar uchun

40 ta javobi tanlanadigan test topshiriqlari, jumladan:

1-fan: 20 ta test biologiya fanidan– 62 ball, har bir to‘g‘ri javob uchun 3,1 baldan;

2-fan: 10 ta test matematika fanidan, shundan 5 ta mantiqiy fikrlashga yo‘naltirilgan – 21 ball, har bir to‘g‘ri javob uchun 2,1 baldan;

3-fan: 10 ta test ingliz tili fanidan – 11 ball, har bir to‘g‘ri javob uchun 1,1 baldan.

8-sinflar uchun

40 ta javobi tanlanadigan test topshiriqlari, jumladan:

1-fan: 20 ta test biologiya-kimyo fanlaridan – 62 ball, har bir to‘g‘ri javob uchun 3,1 baldan;

2-fan: 10 ta test matematika fanidan, shundan 5 ta mantiqiy fikrlashga yo‘naltirilgan – 21 ball, har bir to‘g‘ri javob uchun 2,1 baldan;

3-fan: 10 ta test ingliz tili fanidan – 11 ball, har bir to‘g‘ri javob uchun 1,1 baldan.

Fizika va astronomiya yo‘nalishi bo‘yicha:

7-sinflar uchun

40 ta javobi tanlanadigan test topshiriqlari, jumladan:

1-fan: 20 ta test matematika fanidan, shundan 10 ta mantiqiy fikrlashga yo‘naltirilgan – 62 ball, har bir to‘g‘ri javob uchun 3,1 baldan;

2-fan: 10 ta test fizika fanidan – 21 ball, har bir to‘g‘ri javob uchun 2,1 baldan;

3-fan: 10 ta test ingliz tili fanidan – 11 ball, har bir to‘g‘ri javob uchun 1,1 baldan.

8-sinflar uchun

40 ta javobi tanlanadigan test topshiriqlari, jumladan:

1-fan: 20 ta test matematika fanidan, shundan 10 ta mantiqiy fikrlashga yo‘naltirilgan – 62 ball, har bir to‘g‘ri javob uchun 3,1 baldan;

2-fan: 10 ta test fizika fanidan –21 ball, har bir to‘g‘ri javob uchun 2,1 baldan;

3-fan: 10 ta test ingliz tili fanidan – 11 ball, har bir to‘g‘ri javob uchun 1,1 baldan.

5.3. Kirish imtihonida berilgan topshiriqlarni bajarish uchun 120 daqiqa vaqt ajratiladi,  qayta o‘tkazilishiga yo‘l  qo‘yilmaydi.

5.4. Test sinovlari yakunida har bir o‘quvchining to‘plagan bali kompyuter ekranida ko‘rsatiladi va e’lonlar taxtasida yozib qo‘yiladi. To‘plagan bali natijalari yozma shaklda talabgorlarga tanishtiriladi hamda bu haqida yozma qayd etiladi.

Har bir o‘quvchining test sinovida to‘plagan ballari va to‘liq ma’lumotlari elektron shaklda kompyuter bazasida saqlanadi.

5.5. Test natijalariga ko‘ra, maksimal ball to‘plagan talabgorlar belgilangan qabul kvotasi doirasida ballar ketma-ketligida o‘quvchilar safiga qabul qilinishiga asos bo‘ladi.

Belgilangan qabul kvotasining so‘ngi o‘rinida ballar tengligi yuzaga kelganda, ya’ni bir nechta talabgor bir xil ball to‘plagan vaziyatda, imtihonda yo‘nalish bo‘yicha quyidagi tartibda ustunlik beriladi:

  1. a) test sinovida birinchi fandan yuqori ball to‘plaganlar;
  2. b) test sinovida ikkinchi fandan yuqori ball to‘plaganlar (8-, 10-sinflar uchun).

Agarda bu holatda ham tenglik saqlanib qolsa, qabul komissiyasi tomonidan qo‘shimcha 10 ta topshiriq beriladi. Uning natijasiga ko‘ra yuqori ball to‘plagan talabgor ustunlikka ega bo‘ladi.

5.6. Kirish imtihoni natijalari Agentlik hamda ixtisoslashtirilgan maktablarning rasmiy veb-saytlarida belgilangan muddatlarda e’lon qilinadi.

5.7. Tanlov jarayonini boshqarish, tashkiliy ishlarni bajarish, adolatlilik, xolislilik tamoyillariga amal qilinishini ta’minlash maqsadida qabul komissiyasi tomonidan kirish imtihonlari o‘tkaziladigan joyga bino rahbari va nazoratchilar tayinlanadi.

5.8. Bino rahbari tomonidan quyidagi ishlar amalga oshiriladi:

talabgorlarni tanlov shartlari va hujjatlari bilan tanishtirish;

tanlov jarayonida o‘rnatilgan tartiblarga amal qilmagan talabgorlarni tanlovdan chetlashtirish bo‘yicha dalolatnoma tuzish va qabul komissiyaga topshirish.

5.9. Tanlov jarayonining shaffofligini ta’minlash maqsadida ota-onalar takliflariga ko‘ra   5 nafar ota-onalar xolis kuzatuvchilar sifatida jalb etiladi.

Shuningdek, kuzatuvchilarning imtihon jarayoniga aralashuviga yo‘l qo‘yilmaydi.

5.10. Talabgorlar kirish imtihoni boshlanishidan  kamida 30 daqiqa oldin imtihon o‘tkaziladigan binoda qabul komissiyasi ro‘yxatidan o‘tishlari lozim.

5.11. Talabgorlarda o‘z shaxsini tasdiqlovchi tug‘ilganlik to‘g‘risida guvohnomasi (yoki mavjud bo‘lsa kinder pasport) asli bo‘lishi kerak.

5.12. Qabul komissiyasi ro‘yxatidan o‘tmagan, kechikkan yoki kelmagan talabgorlar tanlovga kiritilmaydi, shuningdek, ular uchun qo‘shimcha ravishda tanlov o‘tkazishga yo‘l qo‘yilmaydi.

5.13. Talabgorga qabul komissiyasi ro‘yxatidan o‘tish paytida imtihon ruxsatnomasi (talabgorning ismi sharifi, sinfi, ta’lim tili, fotosurati) va tartib raqami beriladi.

5.14. Kirish imtihoni axborot kommunikatsiya texnologiyalaridan keng foydalangan holda, shuningdek, videokuzatuv va boshqa elektron-texnik vositalar bilan jihozlangan maxsus binoda tashkil etiladi.

5.15. Talabgorlar kirish imtihoni boshlanishidan kamida 15 daqiqa oldin tartib raqamlari ketma-ketligida va binoda joylashtirilgan kompyuterlar sonidan kelib chiqib, guruhlarga taqsimlangan holda bosqichma-bosqich imtihonlarga kiritiladi hamda ular ushbu raqamlar ostida belgilangan o‘rinlarga joylashib, kirish imtihonini topshiradi. Imtihon davomida belgilangan muddatidan oldin test topshiriqlarini tugatgan o‘quvchilar chiqib ketishlariga ruxsat beriladi.

5.16. Talabgorlarga kirish imtihoni o‘tkaziladigan binoga o‘zi bilan faqat ruchka, qalam, chizg‘ich va o‘chirg‘ich, shuningdek, ichimlik suvi olib kirishlariga ruxsat etiladi.

5.17. Kirish imtihoni jarayonida talabgorlarning bir-birlari bilan gaplashishi, javoblarni bir-biriga ko‘rsatishi, kalkulyator, uyali aloqa vositalari va boshqa har qanday ma’lumot beruvchi qog‘oz va elektron vositalardan foydalanishi hamda boshqalarga ko‘maklashishi ta’qiqlanadi.

5.18. Test sinovlari jarayonida kompyuter bilan bog‘liq texnik nosozliklar (internet uzilishi, kompyuter o‘chib qolishi) yuzaga kelganda, tegishli tartibda bartaraf etiladi.

5.19. Quyidagi holatlar talabgorlarni kirish imtihonidan chetlashtirishga asos bo‘ladi:

kirish imtihoni paytida boshqalardan ko‘chirishga urinish va boshqa talabgorlarga xalaqit berish;

kirish imtihoni belgilangan vaqtda va belgilangan joyiga o‘z vaqtida kelmagan (ishtirok etmagan) holatda;

kirish imtihoni o‘tkazilayotgan vaqtda shpargalka, barcha turdagi mobil aloqa vositalari, kalkulyator, lug‘at, kitoblardan foydalanish.

Yuqoridagi holatlar sodir etilganda qabul komissiyasi tomonidan talabgorga nisbatan tegishli dalolatnoma rasmiylashtiriladi, talabgor javob varaqalarini topshirgan holda imtihonni tark etadi.

5.20. Qabul komissiyasi tomonidan imtihon jarayoniga jalb etilganlardan boshqa shaxslarning kirish imtihoni o‘tkazilishi belgilangan auditoriya va xonalarga kun davomida va imtihon tugaguniga qadar kirish-chiqishiga yo‘l qo‘yilmaydi.

5.21. Kirish imtihoni materiallari Agentlik tashkiliy qo‘mitasi tomonidan tajribali pedagoglarni jalb etgan holda ishlab chiqiladi va ekspertizadan o‘tkazilib, maxfiyligi ta’minlanadi.

6-bob. Apellyatsiya komissiyasi

6.1. Talabgor kirish imtihoni natijalaridan norozi bo‘lgan taqdirda test sinovini yakunlagandan keyin apellyatsiya komissiyasi tomonidan birgalikda ko‘rib chiqiladi.

6.2. Kirish imtihoni natijalaridan norozi bo‘lgan talabgorlarning murojaatlarini ko‘rib chiqish uchun har bir ixtisoslashtirilgan maktabda 3 nafardan kam bo‘lmagan soha mutaxassislaridan iborat apellyatsiya komissiyasi tashkil etiladi va uning shaffof faoliyati ta’minlanadi.

6.3. Apellyatsiya komissiyasi talabgorning ishini ko‘rib chiqish natijasiga ko‘ra norozilik arizasini qanoatlantirish yoki qanoatlantirmaslik to‘g‘risida xulosa beradi.

6.4. Apellyatsiya komissiyasining norozilik arizasini qanoatlantirish to‘g‘risidagi xulosasi talabgorga arizani ko‘rib chiqish natijalari bo‘yicha ball qo‘shib berilishiga asos bo‘ladi.

6.5. Apellyatsiya komissiyasiga boshqa talabgorlarning ishlarini ko‘rib chiqish va murojaatchining ishi bilan solishtirishga ruxsat berilmaydi.

6.6. Talabgorlar va ularning ota-onalari yoki boshqa qonuniy vakillari berilgan javoblardan norozi bo‘lgan taqdirda, belgilangan tartibda yuqori turuvchi organlarga murojaat etish huquqlariga ega bo‘ladi.

7-bob. O’quvchilarni maktabga qabul qilish

7.1. Kirish imtihonlarida eng yuqori ball to‘plagan talabgorlar ballar ketma-ketligida tasdiqlangan qabul kvotasi doirasida ixtisoslashtirilgan maktablarning o‘quvchilari safiga qabul qilinadi.

7.2. Qabul komissiyasi tomonidan tasdiqlangan qaydnomalarga asosan yangi o‘quv yili boshlangunga qadar ixtisoslashtirilgan maktab direktorining o‘quvchilar safiga qabul qilish haqida buyrug‘i chiqariladi.

O’quvchilar safiga qabul qilingandan so‘ng tegishli hujjatlarning asl nusxasi ularning ota-onasi yoki boshqa qonuniy vakillari tomonidan belgilangan tartibda ixtisoslashtirilgan maktabga taqdim etiladi.

7.3. Ixtisoslashtirilgan maktabda qabul qilinishi belgilangan o‘quvchi o‘qishni davom ettirmagan holatlarda, uning o‘rniga to‘plangan ballar ketma-ketligiga asosan navbatdagi talabgor qabul qilinadi.

Navbatdagi talabgorni qabul qilish ballar ketma-ketligi bo‘yicha undan oldingi talabgorning ota-onasi yoki boshqa qonuniy vakili tomonidan o‘qishni maktabda davom ettirish istagi mavjud emasligini tasdiqlovchi hujjat olinganidan so‘ng amalga oshiriladi.

Bunda tasdiqlovchi hujjat kirish imtihonlari natijalari e’lon qilingan kundan yangi o‘quv yili boshlangungacha bo‘lgan muddatda olinishi lozim.

7.4. Belgilangan tartibda tegishli hujjatlarning asl nusxasi taqdim etilmasligi, talabgor o‘qishni davom ettirish istagini bildirmasligi, maktab xodimlari murojaatlariga javob bermasligi undan keyingi talabgorning qabul qilinishi uchun asos bo‘ladi. Ushbu holat bo‘yicha qabul komissiyasi tomonidan tegishli dalolatnoma bilan rasmiylashtiriladi.

Mazkur talablar faqatgina maktabning Agentlik tomonidan qabul kvotasi belgilangan sinflari uchun o‘quv yilining birinchi yarim yilligi bo‘yicha qo‘llaniladi.

8-bob. O’quvchilar safidan chiqarish va bo‘sh o‘rinlarga o‘quvchilarni qabul qilish

8.1. Ixtisoslashtirilgan maktablarning mavjud sinflarida o‘quv yili davomida bo‘shab qolgan o‘rinlar uchun kirish imtihonlari ushbu muvaqqat nizom talablariga muvofiq o‘tkaziladi, mos ravishda davlat va nodavlat umumiy o‘rta ta’lim muassasalarining tegishli sinfini tamomlagan o‘quvchilardan hujjat qabul qilinadi.

Ushbu jarayonlar Agentlik tashkiliy qo‘mitasi bilan kelishilgan holda maktabning qabul komissiyasi tomonidan tashkil etiladi.

8.2. Ixtisoslashtirilgan maktablarga o‘quv yili davomida o‘quvchilarni qabul qilishga ruxsat berilmaydi.

8.3. O’quvchining ota-onasi yoki boshqa qonuniy vakili o‘z xohishiga ko‘ra o‘quv yili davomida yoki u tugaganidan so‘ng ixtisoslashtirilgan maktabdan boshqa umumiy o‘rta ta’lim muassasasiga o‘tkazilishi “O’quvchilarni sinfdan sinfga va bir umumiy o‘rta ta’lim muassasasidan boshqasiga o‘tkazish tartibi to‘g‘risida”gi nizomda (ro‘yxat raqami 2684, 2015 yil 17 iyun) belgilangan tartibda amalga oshiriladi.

8.4. O’quvchilarning o‘qishini bir ixtisoslashtirilgan maktabdan boshqasiga ko‘chirish yo‘nalish mos kelgan va bo‘sh joy bo‘lgan taqdirda Agentlikning ko‘rsatmasiga muvofiq amalga oshiriladi. Qolgan hollarda o‘quvchilarning o‘qishini ko‘chirishga ruxsat berilmaydi.

9-bob. Yakuniy qoidalar

9.1. Ushbu muvaqqat nizomni qo‘llashda yuzaga keladigan nizolar qonun hujjatlarida belgilangan tartibda hal etiladi.

9.2. Ushbu muvaqqat nizom talablari buzilishida aybdor bo‘lgan shaxslar qonun hujjatlarida belgilangan tartibda javob beradilar.